दिल्लीच्या जंतरमंतरा उपरांत झारखंडात विद्यार्थी आंदोलन पेंटला. नीट परीक्षेच्या कोफुसांवा उपरांत अमेरिकन रिटर्न अभिजीत दिपकेच्या नेतृत्त्वात विद्यार्थी आंदोलनाक सुरवात जाल्ली. जाल्यार रांचीत सुरू आशिल्ले विद्यार्थी आंदोलन जेपीएससी (JPSC) म्हळ्यार राज्य पावंड्याचेर जावपी परिक्षेतल्या गैरवेव्हाराक लागून विद्यार्थी चाळवल्यात. नीट परीक्षा जावन पेपर लिक जाल्ल्याची गजाल लक्षात येतकीर NTA म्हळ्यार नॅशनल टेस्टिंग एजन्सीन नीट परीक्षा रद्द केल्ली. पूण पेपर फुटीच्या प्रकरणाक लागून केल्ली मेहनत वाया गेल्ल्याच्या दुख्खान जायत्या विद्यार्थ्यांनी जीव दिलो. उपरांत NTAन नीट परिक्षा घेतली ती गजाल वेगळी पूण त्यानआदी कोणाच्या तरी कुकर्माक लागून विद्यार्थ्यांचेर जीव दिवपाची पाळी येवप ही खरीच गंभीर आनी विचार करपासारखी गजाल. NEET-UG सारकिल्या महत्त्वाच्या परीक्षांचे पेपर लिक जावचे न्ही म्हूण केंद्रान आतां संसदेत कायदो पास करून खर पावलां उबारल्यात. पूण ह्यो गजाली पयलीच जावंक जायशिल्ल्यो. विद्यार्थ्यांच्या भविश्याकडेन खेळपी लोकांनी कशेंच सोडूंक जायना. तांचेर कारवाय ही जावपाकूय जाय.
हांगा प्रश्न पेपर लिक आनी विद्यार्थी आंदोलनाचो ना जाल्यार प्रश्न आसा विद्यार्थी आंदोलना फाटल्यान जाणी आपली पोळी भाजून घेतली तांचो. दिल्लीतले विद्यार्थी आंदोलन योग्यच आशिल्ले. विद्यार्थ्यांच्यो मागण्योय मुद्याक धरूनच आशिल्ल्यो. पूण कांय समाज आनी देश विघातक शक्तींक विद्यार्थ्यी आंदोलनाच्या माध्यमातल्यान आपलो प्रॉपगांडा फुडे व्हरपाचो आशिल्लो. दिल्लीच्या विद्यार्थी आंदोलनाच्या स्टेजीवेल्यान हें दिसूनय आयलां. पूण रांचीत सुरू आशिल्ले विद्यार्थी आंदोलन मात शांतीकायेन आपल्या रास्त मागण्यांक धरून आशिल्ले. थंय विद्यार्थी आंदोलनाभायर खंयचोय गैरप्रकार जाल्ल्याचे दिसून आयले ना. एक्काय विद्यार्थ्यान देशविरोधी घोषणा दिलीना. देशाच्या समाजीक आनी संस्कृतीचेर प्रस्न उप्रासपी गजाली फकत दिल्लीतल्या विद्यार्थी आंदोलनावेळार घडल्यो हें सगळेंच जाणात. जांचो NEET-UG परिक्षेकडेन लागीचोय संबंध नाशिल्लो अशें विद्यार्थी दिल्लीतल्या आंदोलनावेळार भलत्योच गजाली उलोयतालें अशें कित्याक?.
कांय जाणांक जाल्यार NTA म्हळ्यार कितें? NEET-UG परिक्षा म्हळ्यार कितें? हेवूय खबर नाशिल्ले अशेंय तरणाटेय ह्या आंदोलनात वाटेकार जावन देशाचे सांस्कृतिक दायज आनी संप्रभुता आनी अखंडताचेयर प्रस्न उप्रासताले. हे तरणाटे थंय आयलेच कशें, तांकां कोणाचे फाटबळ आशिल्ले कांय?, तांकां कोणे फुडे काडिल्ले?, अशें प्रस्न ह्या तरणाट्यांकडेन पळयल्या उपरांत फुडे येवप स्वभाविक. दुसरेवटेन रांचीतल्या विद्यार्थी आंदोलनात विद्यार्थ्यांक लजेक घालपी, संविधान, स्वातंत्र्य, देशाची संप्रभुता आनी अखंडतायेचेर एक्काय विद्यार्थ्यान प्रस्न केलो ना. दिल्ली आनी रांचीतूय विद्यार्थीच आंदोलनाक बशील्ले. पूण दोनकडेन दोन वेगवेगळ्यो गजाली, वेगवेगळे मुद्दे कशें?. ह्या दोनूय आंदोलनांचें स्वरूप, विद्यार्थ्यांच्यो मागण्यो, राजकी आनी समाजीक फाटबळ आनी मी़डिया कव्हरेज पळयली जाल्यार कांय जाणांनी दिल्लीतल्या विद्यार्थी आंदोलनाक खूप उखलून धरलें. मात रांचीतल्या विद्यार्थी आंदोलनाकडेन ह्याच लोकांनी पुरायेन आडनदर केली, अशें कित्याक?.
तुमका जर विद्यार्थ्यांकूच सपोर्ट करपाचो आशिल्लो जाल्यार रांचीतल्या विद्यार्थ्यांनी तुमचे कितें केल्ले?. दिल्लीत जशें विद्यार्थी आपल्या मागण्यांखातीर एकठाय आयिल्ले तशेंच रांचीयूय विद्यार्थी आपल्या मागण्यांखातीर आंदोलन करतात. ज्या तथाकथीत कॉक्रोच जनता पार्टीन दिल्लीच्या आंदोलनाची धुरा सामाळिल्ली तांकां रांचीतले विद्यार्थी आनी तांचे आंदोलन दिसले ना. कॉक्रोच जनता पार्टीचो सुप्रिमो अभिजित दिपके धरून तांच्या हेरबाकीच्या फुडाऱ्यांनी रांचीतल्या विद्यार्थी आंदोलनाचेर एक उतर लेगीत काडले ना, अशें कित्याक?. जेन्ना रांचीतल्या विद्यार्थ्यांचो आनी तांच्या मागण्यांचो प्रस्न आयलो तेन्ना अभिजित दिपके धरून तांच्या हेर बाकीच्या फुडाऱ्यांची भलायकी इबाटडा, अशें कित्याक?. दिल्लीच्या विद्यार्थी आंदोलनाच्या स्टेजीवेल्यान देश विघातक कारवायो करपी उमर खालीद आनी शेर्जील इमामाक सोडपाची मागणी जाता, अशें कित्याक?. पळोवपाक गेल्यार उमर खालीद आनी शेर्जील इमामाचो विद्यार्थी आंदोलनाकडेन लागीचोय संबंध नाशिल्लो. तरीकूय हो मुद्दो थंय आयलो, अशें कित्य़ाक?. जम्मू काश्मिर भारताचो भाग न्ही म्हणपी तथाकथिक बुद्धिजीवी अरुंधती रॉय़ सारकीली बायल येवन दिल्लीच्या विद्यार्थी आंदोलनाक तेंको दिता. मात हिच बायल रांचीतल्या विद्यार्थी आंदोलनात तोंड लेगीत दाखयना, अशें कित्याक?.
आम आदमी पार्टी, काँग्रेस धरून कम्युनिस्ट पक्षान दिल्लीतल्या विद्यार्थी आंदोलनाक फकत तेंकोच दिलो ना जाल्यार थंय प्रत्यक्ष हजेरी लावन नाकाजाल्ले मुद्दे उपस्थित केले. पूण आम आदमी पार्टी आनी काँग्रेसीच्या फुडाऱ्यांक रांचीतले विद्यार्थी आंदोलन आनी तांचे प्रस्न दिसले ना, अशें कित्याक? दिल्लीतल्या विद्यार्थी आंदोलनाक तेंको दिवपी एक्काय राजकी पक्षान झारखंडातल्या विद्यार्थी आंदोलनाचेर एक शब्द लेगीत काडलो ना, अशें कित्याक?. केंद्रिय शिक्षण मंत्री धर्मेंद्र प्रधानाचो राजीनामो घेवन वोग्गी बशील्ल्या आम आदमी पार्टी, काँग्रेस आनी कॉक्रोज जनता पार्टीक रांचीतल्या विद्यार्थीं आंदोलनाचेर उलयनशें एकदाय दिसलें ना. हांका विद्यार्थी आनी तांच्या प्रस्नांचे इतलेच पडून गेल्ले जाल्यार दिल्लीच्या आंदोलनावेळार केंद्र सरकाराचेर तुटून पडिल्ल्या आम आदमी पार्टी, काँग्रेस आनी कॉक्रोज जनता पार्टीचे फुडारी रांचीतल्या विद्यार्थी आंदोलनाचेर वोग्गी कित्याक?. NEET-UG परीक्षा केंद्राक लागता. जाल्यार (JPSC) परीक्षा झारखंड सरकाराच्या कार्यक्षेत्रात येता. NEET परीक्षेच्या पेपर फुटीची जबाबदारी घेवन केंद्रीय शिक्षण मंत्री धर्मेंद्र प्रधानान राजीनामो दिलो. देखून आतां JPSC परीक्षेतल्या गैरवेव्हाराची जापसालदारकी घेवन हेमंत सोरेन-काँग्रेसीचे सरकार तांच्या शिक्षणमंत्र्याचो राजीनामो घेतली कांय कितें?
